பிரார்த்தனை

கடவுளைக்

கைது செய்து வைத்திருந்தேன்

எனக்கு மட்டுமே உரியவர்

கேட்டதை எல்லாம் கொடுத்துக் கொண்டிருந்தார்

அவர் பலமுறை ஏமாற்றியதை

யாரிடமும் சொன்னதில்லை

எனது அதிகாரத் தோரணை

குறைந்துவிடும்

என்னைப் போன்ற மத்திய வர்க்கத்தினர்

வீட்டில் தான் அவருக்கென்று தனியிடம் உண்டு

ஏழைகள் கோயிலில் தான் அவரைப் பார்க்க வேண்டும்

பணக்காரர்களோ ஊருக்கு ஊர் அவருக்கென்று

கோயில் கட்டி வைத்து விடுகிறார்கள்

முதல் மரியாதையும் பெற்று விடுகிறார்கள்

அவரை வைத்துக் கொண்டும்

பிச்சைக்காரனாக இருப்பதை விட

அவர் இல்லாமலேயே போகட்டும்

அவரிடம் கேட்க வேண்டியது எதுவும் இல்லை

என்னால் அவருக்கு ஆகவேண்டியது எதுவும் இல்லை

பிறகெதற்கு

அவரை நான் வணங்குவதும்

அவர் எனக்கு இணங்குவதும்

அவருக்கு இருக்கின்றன எத்தனையோ சிறைகள்

இருந்து கொள்ளட்டுமே ஏதாவது ஒன்றில்..என்னமோ தோன்றியது எனக்கு இன்று

கடவுளை

விடுதலை செய்து விட்டேன்