கிணற்றில் விழுந்த பாம்பு

ஊரெங்கும் உலகெங்கும்
சுற்றிச் சுற்றி
அனுபவங்களை
விழுங்கத் துடித்த பாம்பு
பசித்த நேரத்தில்
தவளையைத் துரத்திப்போய்
கிணற்றில் விழுந்துவிட்டது

அழுக்கடைந்த கிணற்றின்
பாழடைந்த இடுக்குகளில்
தகாத உணவுகளைத் தின்று
விரும்பாத வாழ்வில் 
வழுக்கி வழுக்கி
விழுந்து கொண்டே இருக்கிறது
கிணற்றில்

கதிரொளி தந்த
கனவுகள் போதுமா?
அவற்றில் ஏறி
வெளியில் வருமா

யோசித்துத் தவம் இருக்கிறது
கிணற்றின் விளிம்பை
நோக்கிக் கொண்டே...

இருளெனும் வரம்

அலைந்து களைத்து

விழுந்துறங்க எத்தனிக்கையில்

எனக்குத் தேவைப்படுகிறது

இருள்

கலைஞர்களும் கவிஞர்களும்

இருள்காட்டிப் பயமுறுத்திவிட்டனர்

ஒளியைப் போலவே தானே

இருளும்

எனது 

கள்ளத்தனங்களை ஒளித்துவைக்க

கவலைகளைப் பயங்களைச்

சுயநலங்களைப் பூட்டிவைக்க,

எனது வேஷங்களின்

பூச்சுக்களைப் பாதுகாக்க..

என்னால் வஞ்சிக்கப்பட்டவர்களின்

முகம்

அதில் பதிந்திருக்கிறது

என்னால் கொலையுண்டவர்கள்

அதில் புதைக்கப்பட்டிருக்கின்றனர்

அடித்து நொறுக்கப்பட்ட 

எனது நல்லெண்ணங்கள்

அந்தக் கல்லறையில் மூழ்கிவிட்டன

இரவின் மடியிலிருந்து

இருட்குழந்தையை 

எடுத்துக்கொள்ளும் ஒளிவிளக்குகள்

அதைத் தங்கள் 

முதுகில் சுமந்து கொண்டிருக்கும்

ஒளிவெள்ளத்தில் மூழ்கிய 

எல்லோர் முதுகிலும்

வழிந்துகொண்டிருக்கும் அவமானங்கள்

நினைவினேலும் 

இருள் இருப்பது நல்லது

மீண்டும் அதன் கோரைப்பற்களில்

சிக்காதிருக்க

எல்லோருக்கும் தேவைப்படுவது

நேசமானது

மனிதராக நம்மை உணரவைப்பது

இருளெனும் ...வரம்

கோழிகள்

குஞ்சுகளைக் கண்டஞ்சும்

கோழிகள்

ஒன்றும் அறியாமல்

வழிதடுமாறிவிடும்

கழுகுகளின் பார்வையில் விழுந்து

கதை முடிந்துவிடும்

ஆனாலும்

நடைபழகுவது

தனியே இருப்பது

போராடுவது

எல்லாம்

குஞ்சுக்கும் தெரியவேண்டும்

அதற்குத் தனியே போயாக வேண்டும்

குஞ்சுகளைக் கண்டஞ்சும் கோழிகள்

குஞ்சுகளாயிருந்தவைதான்

அதற்கும் முன்

முட்டைக்குள் முடங்கியவை

ஓட்டை உடைத்ததும்

உலகின் ஒளியில்

கண்கூசியதே

கோழிகள் அறியும்

ஆனாலும்

காக்கைக்கும் தன் குஞ்சு

பொன்குஞ்சு

கோழிக்கும் தெரியாது

குஞ்சுகளும் அறியாது

குஞ்சு எப்போது

கோழியாகிறது?

துடிப்பு

நீந்திக் கொண்டிருந்த காலம்

வளைந்தும் நெளிந்தும்

ஓடியும் துரத்தியும்

கொறித்தும், அரித்தும்

கழிந்தது

எவன் வீசிய வலையிலோ

சிக்கி, இழுபட்டு

நீருக்கும் மேல் மூச்சுத் திணறி

படகில் விழுந்து

ஐஸ் பெட்டியில்

சிற்றசைவில்

இன்னும் உயிரைப்

பிடித்துத் தொங்கிக் கொண்டிருக்கும்

ஒரு

சிறு

மீன்

விழிக்கும் தருணம்

இருட்டுக்குள்
எங்கோ தலைக்குமேல்
தெரியும் வெளிச்சம்

மிக உயரமாகத் தெரிவது
கிணற்றின் விளிம்புச் சுவர்கள்
யாராவது தண்ணீர் இறைக்கும் போது
அவர்களின் தலை

தண்ணீரும் பாசியும் பூச்சிகளும்
சமமாகத் தெரியும்

மூழ்குவதன் எல்லை
கெட்டித் தரையும்
அதில் விரித்த மண்ணும்

ஒரே பயம் பாம்புகள்
அவை பெரும்பாலும்
கிண்ற்றுக்கு வெளியே
வசிக்கின்றன

எப்போதாவது
தப்பித் தவறி
இறைக்கும் வாளியில்
மேல் சென்று
பரந்த வெளியில்
விழுந்து விடுவதும் உண்டு

மிகவும் அபூர்வமான
அத்தருணத்தில்
உலகம்
எல்லைகளற்றதும்
தானறியாததும்
என்று
வியக்கும் தவளையின்
கண்கள்

நான் காணும் உலகம்

சிறு கண்ணனைப் போலவே

இந்தப் பூமியைப்

பேரண்டத்தை விழுங்கி

என் உள்ளங்கையில்

உங்களுக்குக் காட்ட விரும்புகிறேன்

ஒரு கவிஞன் போல,

விஞ்ஞானி போல

சில நேரங்களில்

பூமியாகவோ

பேரண்டமாகவோ

ஆகிவிட விரும்புவதும் உண்டு

ஒரு துறவி போல.

எனக்கு அகங்காரமோ

பேராசையோ

உலகமும் அண்டமும்

உள்ளது உள்ளபடியே

பனித்துளியில் கடல் தெரிந்தாலும்

கடலிலிருந்து வந்ததே

பனித்துளி

நாம் யார்க்கும் குடியல்லேம்

எண்ணிலா அண்டம் இயற்கையில் எழுந்த

        இயல்பினை கண்டுபி டித்தோம்

    ஏகன னேகன் என்றெலாம் உரைத்த

        எவரது புளுகைம றுத்தோம்

வெண்ணிலா மீன்கள் செங்கதிர் உலவும்

        வீதியை அளந்துமு டித்தோம்

    விரைகிற செயற்கைக் கோள்களை அனுப்பி

        சனியையும் புகைப்படம் பிடித்தோம்

ஆழ்கடல் இறங்கி திமிங்கலம் சுறாமீன்

        கோரலின் சாரம றிந்தோம்

     ஆப்பிரிக்காவில் மனித குலத்தின்

        ஆரம்ப வாழ்வைப் புரிந்தோம்

பாழுடல் என்று ஒதுக்கிய உடலின்

        பாகமும் வேலையும் குறித்தோம்

     பவித்திர மான கடவுளின் தொண்டர்

        பார்க்கிற வகையில் விரித்தோம்

தத்துவம் என்று பித்தர்கள் பேசும்

        சாரமில் கதைதோற் கடித்தோம்

     தாமுயர் வென்று சாஸ்திரம் காட்டும்

        சழக்கரும் நடுங்கிட விழித்தோம்

மூத்தவர் சொன்ன முறைகளில் அடக்கு

        முறைகளை மூச்சொடெ திர்த்தோம்

    முன்னரோ இன்றொ சொன்னதைக் குறள்போல்

        சான்றுடன் பகுத்த றிந்தோம்