அவஸ்தை


எனது நகரத்தின் சாலைகளில்
நெருக்கியடிக்கும் வாகனங்கள்
அவைகளின் போக்கிலே
என்னைத் தள்ளுகின்றன

வலதுபுறம் நூலகம் வரும்போது
பேருந்தொன்று மறித்துவிடுகிறது
போலிஸ்காரர் என்னை முன்னே
போகச் சொல்லுகிறார்

இடதுபுறம் இசைக்கூடம் வரும்போது
யாரோ முக்கியஸ்தருக்காக
எல்லாமே நிறுத்தப் பட்டிருக்கின்றன

நாடகத்துக்குக் கிளம்பும் மாலைகளில்
அலுவலகத்தில் இரவு தங்கவேண்டியதாகிறது
நடன நிகழ்ச்சிக்குச் சீட்டு வாங்கினாலும்
அரங்கில் நுழையமுடியாத கூட்டம்

எனது பயணங்கள் எல்லாமே
திட்டமிடப்படாதவை என்கிறாள் மனைவி

எல்லாத் திட்டங்களும் நிறைவேறாதவை
என்பதறிந்தும்….